دعت سمرالجدايل وانتخت بالقذلـة الهلـه
تبي مني عروس للقصيد ازريت لاغويهـا
ويوم اني لقيت لها الخلود وجيت ابوصل له
تنحرك الكلام اللـي فهقهـا دون مغليهـا
خضع لك راس مسبوق القصايد وانحنى كله
وانا بك شاعرالدنيـا ومشغلهـا وماليهـا
يذكرني رحيلك مجلس بـاق علـى حلـه
مداهيل الرجال اللـي تنومسنـا مواطيهـا
هنا سليت سيف يوفي الثارين مـن سلـه
هنا علقت رمح يطعـن الجـوزا ويطفيهـا
هنا بينت مصحفـك الكريـم ودلنـا دلـه
معك نبدا مواعيـد الكـلام وننتهـي فيهـا
هنا ساقيت غصن من غلا كنا تحت ظلـه
نسولف بالغنا يا بايـع الدنيـا وشاريهـا
هنا كان الرجال جبال ما تقبل خنـا الزلـه
عمايمها سحـاب وابلـه باقـي مواظيهـا
رجال لو تشوف الماء غدر ما شربتـه لله
نبت عشب الرضا يا سيدي بأول مغازيهـا
هل التوحيد وكنوز العلوم ونصـرة الملـه
رجال يضحـك التاريـخ لولهـا وتاليهـا
هنا ماضيك ورياض الخليل اللي رعى خله
شربنا عذبها مدري لعبنـا فـي مغانيهـا
هنا تخنقني العبرة وانا اكتب يا رسـول الله
على قبرك نسيت الناس حاقدهـا وحانيهـا
وابو قبر يتيه من الفخـر بالبيـد وتجلـه
على حسد تبين مـن سمايمهـا وصاليهـا
ويهناك الوفا قبر يضمـك فـي ثـرا تلـه
ما دامه بين فردوس الجنان وبين منشيهـا
وانا لامن ذكرت فراقك اللي في يدي غلـه
نسيت ان الليالي شيبتنـي مـن بلاويهـا
على بعد الزمان اللي يعقد الحبـل ويحلـه
ليامني ذكرتك طاحـت الدمعـة وراعيهـا
سلام الله ما هز الصبـا نسرينـه و فلـه
على الطفل اليتيم اللي عطى الدنيا معانيهـا
الثلاثاء أبريل 07, 2009 12:19 pm
